Deddf Diogelu Data

Deddf Diogelu Data

Rydym i gyd yn gweithredu mewn byd sy’n cael ei yrru gan ddata ac wrth i dechnoleg ddatblygu’n gyflym, ni fu erioed mor bwysig cadw data’n ddiogel a chydymffurfio â’r gyfraith diogelu data ddiweddaraf.

Gall ein cyfreithwyr diogelu data profiadol sicrhau bod gennych y cytundebau, y polisïau a’r arbenigedd mewnol cywir i gadw data’n ddiogel, cydymffurfio â rheoliadau, a’ch diogelu chi a’ch sefydliad yn llawn.

Beth yw’r cyfreithiau diogelu data allweddol yn y DU?

Y Rheoliad Diogelu Data Cyffredinol (GDPR) a Deddf Diogelu Data 2018 yw’r cyfreithiau allweddol sy’n llywodraethu materion diogelu data yn y DU. Gall ein cyfreithwyr diogelu data eich cynghori ar gael y polisïau, prosesau a dogfennau cywir yn eu lle i wneud yn siŵr eich bod yn cydymffurfio â’r deddfau diogelu data hyn.

Pa fathau o fusnesau sy'n destun rheolau diogelu data?

Os ydych yn fusnes neu’n gyflogwr sy’n prosesu data personol yn y DU (neu’n ei drosglwyddo allan o’r DU), rydych yn ddarostyngedig i GDPR a’r Ddeddf Diogelu Data ac mae gennych gyfrifoldebau diogelu data. Gall hyn fod yn ddata personol eich cyflogeion, cwsmeriaid neu wrthrychau data eraill.

Sut gallwn ni helpu gyda'ch cydymffurfiad diogelu data?

Mae ein harbenigedd mewn cyfraith diogelu data yn cynnwys:

• Cynnal gwiriadau iechyd data – byddwn yn adolygu eich systemau prosesu data mewnol yn drylwyr i asesu eich cydymffurfiad presennol â chyfraith diogelu data a chynghori ar atebion i unrhyw fylchau, gan gynnwys lle gallai fod angen asesiadau effaith diogelu data;
• Polisïau a Gweithdrefnau Diogelu Data – gallwn adolygu a pharatoi ystod o bolisïau preifatrwydd wedi’u teilwra i’ch anghenion gan gynnwys polisïau diogelu data mewnol, polisïau preifatrwydd gwefan a hysbysiadau preifatrwydd gweithwyr sy'n cydymffurfio â'r egwyddorion a rheolau diogelu data a nodir yn y GDPR;
• Rhannu data gyda sefydliadau eraill– gallwn ddrafftio cytundebau rhannu a phrosesu data sy’n cydymffurfio â chyfraith diogelu data;
• Rheoli achosion o dorri rheolau data – rydym yn cynnig cyngor ar sut i ymdrin ag achosion o dorri rheolau data, gan gynnwys rhoi ar waith unrhyw gamau adferol sydd eu hangen i fynd i’r afael â thoriad data a’ch cynghori ynghylch pryd mae angen gwneud adroddiad i Swyddfa’r Comisiynydd Gwybodaeth;
• Hawliau data unigolion – rydym yn darparu cymorth i ymdrin â cheisiadau gan unigolion i arfer eu hawliau preifatrwydd data, gan gynnwys ceisiadau gwrthrych am wybodaeth;
• Diogelu data cyflogaeth – gall ein tîm cyflogaeth gynghori eich sefydliad neu eich swyddog diogelu data ar eu rhwymedigaethau o dan gyfreithiau diogelu data perthnasol, gan gynnwys diwygio contractau cyflogaeth at ddibenion cydymffurfio;
• hyfforddiant – gallwn ddarparu hyfforddiant diogelu data personol a gweminar wedi’i deilwra i anghenion eich sefydliad.

Mae ein cyfreithwyr diogelu data yn gweithio yn ein timau corfforaethol, masnachol, ymgyfreitha a chyflogaeth a gallant roi cyngor i chi ar gydymffurfiaeth diogelu data ochr yn ochr â’ch anghenion busnes eraill, megis yn ystod trafodion neu anghydfodau corfforaethol.