02920 829 100 
Dychwelyd i'r gweithle: a allaf fonitro a chasglu gwybodaeth am fy staff?
Gorffennaf 6, 2020
Mae mesurau gwahanol yn cynnwys defnyddio sganwyr thermol i wirio am dymheredd, apiau ffôn sy'n nodi pa mor agos yw'r staff, a bandiau arddwrn i fonitro lleoliad ffisegol gweithiwr ar y safle.
Ar gyfer busnesau llai, gallai mesurau mwy ymarferol i nodi risgiau gynnwys gofyn am hunan-ddatganiadau iechyd da, holiaduron staff, a/neu brofion gwrthgyrff.
Er y gallai'r mesurau hyn leddfu rhywfaint o bryder ynghylch iechyd a diogelwch, dylai cyflogwyr hefyd ystyried nifer o faterion cyfreithiol. Er enghraifft, mae'n amheus a all cyflogwyr orfodi staff i gydymffurfio â'r mesurau hyn, neu a all cyflogeion fod yn destun camau disgyblu os ydynt yn gwrthod. Mae hyn hefyd yn debygol o amrywio rhwng diwydiannau; er enghraifft, mae monitro ffitrwydd i weithio a chynnal gwiriadau iechyd (mwy ymwthiol) yn debygol o fod yn hanfodol i feddygon a gweithwyr gofal, ac felly gellid ei ystyried yn afresymol i weithwyr o'r fath wrthod cydymffurfio. Fodd bynnag, efallai nad yw hyn yn wir yng nghyd-destun swyddfa.
Mae materion diogelu data hefyd i gyflogwyr eu hystyried, gan y byddai’r mesurau’n cynnwys cadw data personol o dan GDPR. Mae'n bwysig nodi bod gwybodaeth iechyd staff yn gategori arbennig o ddata personol, ac felly dim ond ar seiliau penodol y gellir ei phrosesu. Dylid hefyd ystyried cael caniatâd trydydd parti.
Syniadau da i gyflogwyr:
Sicrhewch fod gennych resymau dilys dros gasglu gwybodaeth am eich staff. Er y gallai fod yn rhesymol prosesu’r wybodaeth hon (gan gynnwys data iechyd) yn ystod pandemig byd-eang i sicrhau iechyd a diogelwch staff yn y gweithle, ni ddylech gasglu gwybodaeth ddiangen neu ormodol gan y byddai hyn yn torri’r GDPR.
Siaradwch â’ch staff ynglŷn â pham yr ydych yn monitro eu ffitrwydd i weithio, pa wybodaeth y byddwch yn ei chasglu a sut y byddwch yn ei defnyddio, sut y byddwch yn ei storio ac yna’n cael gwared arni, ac a fyddwch yn ei rhannu ag unrhyw drydydd parti.
Gwiriwch eich polisïau iechyd a diogelwch yn y gwaith, ac ystyriwch a oes angen Polisi Pandemig newydd arnoch i osod rheolau penodol ynghylch monitro a chasglu data personol staff yn ystod pandemig.
Adolygu canllawiau'r Llywodraeth a Sefydliad Iechyd y Byd mewn perthynas â mesurau i amddiffyn iechyd a diogelwch yn y gweithle. Mae'r canllawiau'n cael eu diweddaru'n barhaus felly dylech wirio eu gwefannau yn rheolaidd am y datblygiadau diweddaraf.
Sicrhewch eich bod yn cymhwyso unrhyw fesurau yn gyson i'ch holl staff. Os byddwch ond yn casglu gwybodaeth neu’n profi grwpiau penodol o weithwyr y canfyddir eu bod mewn mwy o berygl o fod wedi dal COVID-19, gallech wynebu hawliad gwahaniaethu.
I siarad ag un o'n harbenigwyr heddiw, cysylltwch â ni ar 02920 829 100 neu drwy ddefnyddio ein ffurflen Cysylltwch â Ni am sgwrs gychwynnol am ddim i weld sut gallwn ni helpu.
