02920 829 100 
Diwedd Furlough: Beth sydd wedi Digwydd ers hynny?
Hydref 27, 2021
Ar 30 Medi 2021, daeth y Cynllun Cadw Swyddi Coronafeirws (CJRS), a gefnogodd filiynau o weithwyr drwy gydol y pandemig, i ben.
Beth oedd y CJRS?
Wedi’i ganmol fel achubiaeth i gyflogwyr yn ystod pandemig Covid-19, cyflwynwyd y CJRS gyntaf gan Lywodraeth y DU ar 20 Mawrth 2020 er mwyn atal diswyddiadau a chefnogi cyflogwyr yr effeithiwyd arnynt yn ddifrifol gan COVID-19. O dan y cynllun, cyfrannodd Llywodraeth y DU at gyflogau unigolion cymwys nad oedd yn gallu gweithio a’r rhai nad oedd eu cyflogwyr yn gallu fforddio eu talu, hyd at derfyn misol o £2,500.
Amcangyfrifwyd bod y CJRS wedi rhoi cymhorthdal i gyflogau mwy nag 11 miliwn o swyddi drwy gydol cyfnod y cynllun. Fodd bynnag, wrth i’r cynllun ddod i ben ar 30 Medi 2021, amcangyfrifodd y Swyddfa Ystadegau Gwladol fod bron i filiwn o bobl yn dal i gael eu cefnogi gan y cynllun. Ysgogodd hyn bryder y byddai diwedd y CJRS yn arwain at ddiswyddiadau eang a diweithdra.
Beth sydd wedi digwydd ers diwedd y CJRS?
Er gwaethaf ofnau y byddai diwedd y CJRS yn arwain at don o golli swyddi, mae data cynnar yn awgrymu bod nifer y diswyddiadau a gynigiwyd gan gyflogwyr ym mis Medi yn agos at yr isafbwyntiau erioed.
Dywedwyd bod ychydig dros 200 o gwmnïau yn y DU wedi hysbysu'r Llywodraeth am gynlluniau i ddileu swyddi ym mis Medi, gyda chyfanswm o 13,836 o swyddi mewn perygl. Mae'r data cynnar hwn yn dangos marchnad lafur fwy addawol ar ddiwedd y CJRS nag a ragwelwyd yn wreiddiol. Ceir tystiolaeth bellach o hyn gan fusnesau unigol fel British Airways, defnyddiwr mwyaf y CJRS, a ddaeth â’u holl weithwyr ar ffyrlo yn ôl erbyn diwedd mis Medi.
Fodd bynnag, mae'n bwysig nodi mai dim ond cwmnïau sy'n bwriadu dileu 20 neu fwy o swyddi sy'n gorfod adrodd ar y ffigurau hyn i'r Llywodraeth. O ganlyniad, nid yw busnesau llai, a gafodd eu taro galetaf gan bandemig Covid-19, wedi’u cynnwys yn y ffigurau diswyddo hyn.
O ystyried bod chwech o bob deg o weithwyr ar ffyrlo yn cael eu cyflogi gan gwmnïau â llai nag 20 o weithwyr, mae pryderon nad yw’r data cynnar hwn yn adlewyrchiad cywir o’r farchnad lafur gyfan. Bydd angen aros felly i weld effaith lawn diwedd y CJRS a’i effaith ar fusnesau llai dros y misoedd nesaf.
I gael rhagor o wybodaeth a chyngor ar yr opsiynau sydd ar gael i gyflogwyr ar ôl i’r CJRS ddod i ben, darllenwch ein cyngor diweddaraf yma.
I gael sgwrs am ddim, heb unrhyw rwymedigaeth ynghylch sut y gallwn eich helpu gyda'r uchod, cysylltwch â Owen John ar ojohn@darwingray.com / 02920829118.
I siarad ag un o'n harbenigwyr heddiw, cysylltwch â ni ar 02920 829 100 neu drwy ddefnyddio ein ffurflen Cysylltwch â Ni am sgwrs gychwynnol am ddim i weld sut gallwn ni helpu.
