02920 829 100 
Newidiadau Angenrheidiol i Lawlyfrau Staff yn 2024
Chwefror 16, 2024
Gan Owen John
Bydd newidiadau mawr i Gyfraith Cyflogaeth yn 2024. Er mwyn osgoi cael eich gadael ar ôl, mae ein tîm cyflogaeth yn amlinellu'r diweddariadau y bydd angen i bob cyflogwr eu gwneud i’w Llawlyfr Staff yn y misoedd nesaf. Am fwy o wybodaeth, cysylltwch â’n tîm cyflogaeth drwy ffonio 02920 829 100 neu yma.
Polisi Absenoldeb Gofalwyr
Erbyn pryd? 6 Ebrill 2024
Bydd gweithwyr yn cael hawl gyfreithiol newydd i gymryd wythnos o wyliau di-dâl y flwyddyn er mwyn darparu neu drefnu gofal ar gyfer dibynnydd sydd ag angen gofal hirdymor. Bydd hwn yn hawl o’u diwrnod cyntaf yn y swydd. Mwy o fanylion yma.
Polisi Absenoldeb Gofal Newyddenedigol
Erbyn pryd? Yn ddiweddarach yn 2024 (yr union ddyddiad i'w gadarnhau)
Bydd gan rieni plant sy'n derbyn gofal newyddenedigol hawl newydd i gymryd hyd at 12 wythnos o absenoldeb. Bydd hwn yn hawl o’u diwrnod cyntaf yn y swydd ac yn hawl ar wahân i fathau eraill o absenoldeb, er enghraifft absenoldeb mamolaeth, tadolaeth, mabwysiadu ac absenoldeb rhiant a rennir.
Polisi Hawl i Ofyn am Batrwm Gweithio Rhagweladwy
Erbyn pryd? Mis Medi 2024
Bydd unigolion sy’n gweithio oriau afreolaidd (ee gweithwyr dim oriau) nawr yn gallu gofyn am batrwm gwaith mwy rhagweladwy gan eu cyflogwr. Bydd gan y cyflogwr fis i ddelio â'r cais ac i ymateb iddo. Mwy o fanylion yma.
Polisi Absenoldeb Tadolaeth
Erbyn pryd? 6 Ebrill 2024
Bellach bydd gan dadau a phartneriaid lawer mwy o hyblygrwydd wrth gymryd absenoldeb tadolaeth. Er enghraifft, byddan nhw bellach yn gallu cymryd cyfnod o absenoldeb ar unrhyw adeg o fewn y flwyddyn gyntaf ar ôl genedigaeth y plentyn a byddan nhw’n gallu cymryd absenoldeb dros mwy nag un cyfnod. Bydd y cyfnod rhybudd ar gyfer hysbysu'r cyflogwr am y bwriad i gymryd absenoldeb tadolaeth hefyd yn lleihau i 28 diwrnod. Mwy am y newidiadau i absenoldeb tadolaeth yma.
Polisi Diswyddo a Pholisi Mamolaeth
Erbyn pryd? 6 Ebrill 2024
Ar hyn o bryd, mae gweithwyr sydd ar absenoldeb mamolaeth yn cael blaenoriaeth o ran cael cynnig unrhyw swyddi gwag eraill addas yn ystod proses ddiswyddo. Fodd bynnag, bydd yr amddiffyniad yma’n cael ei ymestyn i'r rhai sydd wedi hysbysu eu cyflogwr eu bod yn feichiog a hefyd i'r rhai sydd wedi dychwelyd i gyfnod o absenoldeb mamolaeth yn ddiweddar ac wedi rhoi genedigaeth yn ystod y 18 mis blaenorol.
Polisi gweithio hyblyg
Erbyn pryd? 6 Ebrill 2024
Er mai dim ond un cais gweithio hyblyg y flwyddyn y gall gweithwyr ei wneud ar hyn o bryd ar ôl cael eu cyflogi am o leiaf chwe mis, bydd hyn nawr yn cynyddu i ddau gais y flwyddyn a bydd ar gael o ddiwrnod cyntaf cyflogaeth y gweithiwr. Bydd yr amser sydd gan gyflogwyr i ymateb hefyd yn lleihau o dri mis i ddau fis. Mwy o fanylion yma.
Polisi Gwrth-Aflonyddu a Bwlio
Erbyn pryd? Mis Hydref 2024
Bellach bydd dyletswydd gadarnhaol a rhagweithiol ar gyflogwyr i gymryd camau i atal aflonyddu rhywiol yn y gweithle. Bydd angen i'r ddyletswydd yma gael ei hadlewyrchu mewn Polisïau Gwrth-aflonyddu a Bwlio.
Os oes angen cymorth arnoch i adolygu a diweddaru eich polisïau er mwyn adlewyrchu’r newidiadau uchod, cysylltwch ag Owen John drwy ffonio 02920 829 118 neu ojohn@darwingray.com i gael sgwrs gychwynnol am ddim i weld sut y gallwn eich helpu.
I siarad ag un o'n harbenigwyr heddiw, cysylltwch â ni ar 02920 829 100 neu drwy ddefnyddio ein ffurflen Cysylltwch â Ni am sgwrs gychwynnol am ddim i weld sut gallwn ni helpu.
