Pam mae Cytundeb Cyfranddalwyr yn Bwysig – Canllaw i Fusnesau Bach a Chanolig

Hydref 12, 2022

Pam mae Cytundeb Cyfranddalwyr yn Bwysig – Canllaw i Fusnesau Bach a Chanolig

---

Gan Stephen Thompson

Fel perchennog busnes, mae'n siŵr y byddwch am leihau gwariant a gwneud y mwyaf o arian, yn enwedig gyda chostau tanwydd a'r argyfwng costau byw presennol. Fodd bynnag, mae buddsoddi mewn ychydig o feysydd cyfreithiol allweddol, fel rheoleiddio’r berthynas rhwng y sylfaenwyr drwy ddefnyddio cytundeb cyfranddalwyr, yn hollbwysig a gall dalu ar ei ganfed wrth symud ymlaen.

Beth yw cytundeb cyfranddalwyr?

Contract cyfreithiol rhwng cyfranddalwyr cwmni yw cytundeb cyfranddalwyr. Fel arfer maen nhw’n gytundebau preifat a chyfrinachol rhwng cyfranddalwyr sy'n nodi telerau amrywiol y cytunwyd arnyn nhw rhwng y cyfranddalwyr mewn perthynas â'u cyfranddaliadau yn y cwmni a sut gellir gwneud penderfyniadau yn y cwmni.

Does neb yn cychwyn busnes gyda'r bwriad o ffraeo gyda'u cyd-sylfaenwyr neu fuddsoddwyr eraill. Fodd bynnag, yn anffodus, mae anghydfodau busnes rhwng partneriaid sefydlu busnes, cyd-gyfranddeiliaid, ffrindiau neu aelodau o'r teulu sydd mewn busnes gyda'i gilydd yn llawer rhy gyffredin. Gall anghydfodau o'r fath fod yn hynod o ddrwg ac yn ddrud i'w datrys.

Gallai problemau godi oherwydd bod y partïon yn anghytuno ar benderfyniadau busnes pwysig, efallai y bydd un ohonyn nhw am dynnu eu harian allan o’r cwmni a chychwyn menter newydd, neu efallai nad yw’r busnes wedi bod mor llwyddiannus â’r disgwyl.

Beth yw pwrpas cytundeb cyfranddalwyr?

Nid yn unig gall anghydfodau rhwng cyfranddalwyr arwain at gamau cyfreithiol drud, maen nhw hefyd yn tarfu’n fawr ar y busnes.

Bydd cytundeb cyfranddalwyr yn helpu i leihau’r risg o anghydfod gan ei fod yn helpu’r cyfranddalwyr i fynd i’r afael â materion allweddol yn gynnar a dylai, gobeithio, reoleiddio’r berthynas rhwng y cyfranddalwyr wrth i’r busnes dyfu.

Yn ogystal â rheoleiddio materion rheoli o ddydd i ddydd, gellir defnyddio cytundeb cyfranddalwyr i fynd i’r afael â materion mwy sylfaenol fel beth mae’r cyfranddalwyr ei eisiau o’r busnes ac o’u buddsoddiad?

Mae’n debygol y bydd gan y cyfranddalwyr mewn busnes flaenoriaethau gwahanol, rhai personol ac i’r busnes, ac felly mae angen iddyn nhw wneud yn siŵr bod pawb yn mynd i’r un cyfeiriad drwy nodi a chytuno ar sut maen nhw’n bwriadu rheoli eu strategaethau ymadael priodol pe bai angen.

Beth ddylai cytundeb cyfranddalwyr ei gynnwys?

Mae materion y gellir ymdrin â nhw fel arfer mewn cytundebau cyfranddalwyr yn cynnwys:

• a ddylai fod unrhyw rwymedigaethau neu gyfyngiadau ar yr hyn y gall ac na all pob cyfranddaliwr ei wneud, tra eu bod yn gyfranddaliwr ac ar ôl hynny?
• a ddylid talu difidendau neu ail-fuddsoddi'r elw? Os ydyn nhw’n cael eu talu, a ddylai pob cyfranddaliwr fod â hawl i'r un swm?
• pa hawl sydd gan bob cyfranddaliwr i unrhyw gyfranddaliadau newydd a gyhoeddir?
• beth sy'n digwydd os bydd un o'r cyfranddalwyr am werthu eu cyfranddaliadau?
• a ddylai fod gan bob cyfranddaliwr, ni waeth pa mor fach yw eu cyfranddaliad, hawl i gael eu penodi’n gyfarwyddwr y cwmni?
• beth sy'n digwydd os bydd anghytundeb – sut bydd yr anghydfod yn cael ei ddatrys os bydd y cyfranddalwyr yn cyrraedd sefyllfa ddiddiwedd?

Y gobaith yw, drwy drafod, dod i gytundeb a chofnodi’r penderfyniadau yma o’r cychwyn, ar ffurf cytundeb cyfranddalwyr, y gellir lleihau’r risg o ffrae yn ddiweddarach. Fodd bynnag, os bydd hi’n dod i’r pen a bod ffrae yn anochel, mae cytundeb cyfranddalwyr yn gweithredu fel cod ar gyfer sut y dylid ymdrin â'r anghytundeb fel y gellir datrys yr anghydfod mor gyflym a chost effeithiol â phosib, gan ganiatáu i bawb symud ymlaen gyda chyn lleied o amharu â phosib ar y busnes.

Os hoffech ragor o wybodaeth am yr uchod neu fater cysylltiedig arall, cysylltwch â Steve Thompson i gael sgwrs am ddim, heb rwymedigaeth. yma.